ARA BUL

Tweet

Pocket

Bir sözüm vardır sana eyle kabûl
Hâb-ı gafletden uyan Hakk’a kul ol
Kande dirseñ dergeh-i Rahmâna yol
Sende iste sende ara sende bul
(Vechine bak hazretinde dâim ol)
*
Bu fenâ külhâna bakma yâra var
Hârzâr-ı dünyeden gülzâra var
Taşra çıkma yârı sende ara var
Sende iste sende ara sende bul
(Vechine bak hazretinde dâim ol)
*
Al melâmet hırkasın seccâde et
Secdegâh-ı tende Hakk’a secde et
Kâ’be-i rûhıñı saña kıble et
Sende iste sende ara sende bul
(Vechine bak hazretinde dâim ol)
*
Men arafdan ders okı bil kendiñi
Metn-i zât-ı Hakka şerh bil zâtıñı
Ger dilersen bulasın sen Rabbiñi
Sende iste sende ara sende bul
(Vechine bak hazretinde dâim ol)
*
Sa’diyâ feryâdıña n’oldı sebeb
Çün senin zârıñ baña virdi ‘aceb
Aslıñı sen eyler-iseñ ger taleb
Sende iste sende ara sende bul
(Vechine bak hazretinde dâim ol)
***** Hâfız Sa’dî *****